1. Главная
2. Пресс-центр
3. «Чĕлхе пулмасан халăх та пулмасть …» («Нет языка – нет народа…») темăпа çавра сĕтел пулса иртрӗ

«Чĕлхе пулмасан халăх та пулмасть …» («Нет языка – нет народа…») темăпа çавра сĕтел пулса иртрӗ

Нарӑс уйӑхӗн 26-мӗшӗнче Чӑваш Республикин вӗренӳ институтӗнче «Чĕлхе пулмасан халăх та пулмасть …» («Нет языка – нет народа…») темăпа çавра сĕтел пулса иртрӗ. Ăна пирӗн ентеш, паллӑ ăсчах, филологи ăслăлăхĕн докторӗ Николай Иванович Егоров профессор çуралнăранпа 75 çул çитнине тата Пĕтĕм тĕнчери тăван чĕлхе кунне халалланӑ.

Ĕçлĕ калаçăва Чăваш Республикин вĕренӳ институчĕн ĕçтешĕсем, филологи ăслăлăхĕн докторĕсем, педагогика ăслăлăхĕн кандидачĕсем, студентсем активлӑ хутшӑнчӗҫ. Тухса калаҫакансем пурте Николай Иванович Егоров профессор пурнăçĕпе тата ĕçĕ-хĕлĕпе кĕскен паллаштарчĕҫ, унăн çитĕнĕвĕсем пирки хыпарларĕҫ. Николай Ивановичӑн ĕçĕсене вуланă кашни чăваш çынни тăван чĕлхе илемлĕхĕпе аваллăхне курма-туйма, унăн тĕнчери ытти тĕрĕк чĕлхисен йышĕнчи вырăнĕпе пĕлтерĕшне ăша хывма, юратма тата хисеплеме вĕренни пирки каларĕҫ. Вĕсем Николай Ивановичăн чĕлхе пĕлĕвĕнчи, халăх сăмахлăхĕпе этнографийĕнчи, халăх историйĕпе культурине тĕпчес ĕçри çитĕнĕвĕсене палăртрĕç.
Вӑрмар муниципалитет округӗн чӑваш чӗлхипе литература вӗрентекенӗсем Мухтавлă ентеше уявпа саламлама тата ҫак ҫавра сӗтеле хутшӑнма кӑмӑл турӗҫ. Вĕрентекенсем юбиляра тăван округра ӑна мĕнле хисеплени, унăн ĕçĕсем пĕтĕм чăваш халăхĕшĕн пысăк пĕлтерĕшле пулнине палӑртӗҫ. Пӗтӗм кӑмӑлтан парнесем парса чыс турӗҫ. Нумай ҫул пурӑнма, татах та ытларах кӗнеке ҫырма, ҫирӗп сывлӑхлӑ пулма сунчӗҫ.